قرار جمهوري للقضاء علي تجار العملة والدهب في السوق السوداء والاحتكار للسلع

بقلم دكتور/ طارق مصطفي

إيه اللي بيحصل في رئاسة الجمهورية وإيه قصة القرار الجمهوري الجديد وليه الرئيس أتدخل بنفسه عشان ينهي الفوضى في سوق الصرف والسلع والإحتكار وارتفاع الأسعار..
على مدار شهور طويلة الحكومة والجهات الرقابية إستنفدت كل محاولات القضاء على الفوضى اللي حاصلة في الأسواق من إحتكار وحجب للسلع ورفع أسعارها إلي المضاربة على الدولار والعملات والتسعير الوهمي والتلاعب في أسعار الدهب وتحولت مافيا الأسواق إلي وحش ضخم وشبكات عنكبوتية كل هدفها الربح وخلاص وعمي قلوبها الجشع وليه لأ وهنا بيكسبوا ملايين الملايين كل طلعة شمس..

الرئيس السيسي أصدر القرار الجمهوري للقضاء على كل مظاهر الإحتكار والتربح والتلاعب والغش وحجب المنتجات..

قرار الرئيس كان باعتبار كل جرائم الأسواق اللي قلنا عليها سواء في الأسواق العادية أو أسواق العملة والمتاجرة فيها بشكل غير شرعي قضايا أمن قومي يعني بتخضع للقضاء العسكري.. يعني إيه بقي الكلام ده..

يعني حضرتك خلاص زمن الفوضى إنتهي وكله هيتحاسب وخلينا بس في الأول نقول لحضراتكم إن القضاء العسكري جزء من القضاء المصري وليه ضوابط وقوانين بتحكمه لكن بيتميز في سرعة إنجاز القضايا لأنه بينتظر قضايا زي ما قلنا بتهدد الأمن القومي ولازم يكون حكمه سريع وناجز.

وقال القرار إن الرئيس/ عبد الفتاح السيسي صدق على قانون يسمح بإحالة مافيا السوق السوداء، والمتورطين في إحتكار وتخزين السلع الأساسية إلى القضاء العسكري بعد موافقه مجلس النواب طبعا.

طبعا القرار عمل حالة فوضى في الأسواق ورعب بين تجار السلع والدولار والدهب وعصابات التهريب والمضاربة وكله راجع حساباته ومن ساعة القرار بردوا بدأت عملية الإتجار في السوق السوداء للدولار تقل وده لأن التاجر اللي هيوقع محدش هيسمي عليه وهيتحاكم كأنه خطر على الأمن القومي ، ودا بخلاف إن في نفس الوقت الداخلية وأجهزة الأمن عامله حاجه عظمه في ملاحقة وضبط تجار الأزمات وخاصة تجار العملة والدهب وقدرت تفكك شبكات وعصابات خطيرة لدرجة إنها مسكت 1387 قضية حجب سلع تموينية ضخمة خلال 24 ساعة الماضية فقط، منها قضية إتمسك فيها 1060 طن سلع تموينية، و164 ألف لتر مواد بترولية، و3 آلاف كرتونة سجاير..

تخيل دا كله إتمسك في قضية واحدة ضمن 1387 قضية في يوم واحد ودا بيورينا قوة وتوحش مافيا وعصابات حجب السلع، وقبلها تمكنت أجهزة الأمن من ضبط ما لا يقل عن 7 آلاف قضية حجب سلع تموينية متنوعة ومواد بترولية ومئات الآلاف من عبوات السجاير.

ودا غير القبض على أسماء تقيلة في مافيا وأباطرة الدهب والنقد الأجنبي واللي التحقيقات معاهم وصلت لأسماء تانية لحيتان كبار مسيطرين على السوق ومتحكمين في تحديد الأسعار وتم القبض عليهم طبعا.
مصر في حالة حرب حقيقية الخطر علي أبوابها الشرقية قادم لا محالة
وفي أية حروب يجب أن تكون الجهة الداخلية مستقرة مؤمنة متماسكة وإلا خسرت الحرب بسهولة
لذلك يمكن في حالة الحروب إستخدام إجراءات إستثنائية
لذلك أعتقد أن أي قرار إستثنائي سيتخذه الرئيس ضد هؤلاء المافيا سيدعمه الشعب كله